Tengslanet og Þekkingarflóra prýða nú veggi Verzlunarskóla Íslands
Síðastliðinn föstudag fékk Verzlunarskóli Íslands listamanninn og fyrrum nemanda skólans, Pétur Geir Magnússon, í heimsókn til að kynna tvær nýjar lágmyndir eftir sig. Myndirnar eru staðsettar á veggjum annarar hæðar skólans.
Pétur Geir flutti ræðu við þetta tilefni þar sem hann sagði það mikinn heiður að eiga verk í skólanum. Pétur Geir, sem útskrifaðist frá skólanum árið 2014, rifjaði upp skólagöngu sína og lýsti jafnframt yfir ánægju sinni með listabraut skólans og sagði hana mikilvæga viðbót við námsvalið.
„Ég var á viðskiptabraut, viðskiptasviði og ég verð að segja að ég hefði nánast fórnað fótlegg fyrir að fá að vera á listabraut eins og nú er hægt að gera. Mér líst rosalega vel á þær breytingar skólans að nú sé komin listabraut og ég held að með þeirri viðbót við námsval skólans haldi Versló áfram að skipa sér í forystu til framtíðar því sköpun og hugmyndaauðgi skipta sífellt meira máli í framtíðinni“
Í ræðu sinni lagði Pétur Geir áherslu á þau tengsl sem myndast á skólagöngunni og hversu dýrmæt þau eru í framtíðinni. Hann sagði félagslífið hafa verið stóran hluta af sinni skólagöngu og að hann hafi kynnst fjölda fólks sem hefur reynst honum vel í lífinu. Þess vegna fékk annað verkið heitið TENGSLANET og tákna þræðirnir í verkinu tengslin sem myndast á námsárunum.
Hitt verkið nefnist ÞEKKINGARFLÓRA og endurspeglar fjölbreytileika nemenda skólans. Litríku fletirnir á verkinu eru tákn um nemendur skólans sem koma í skólann með ólíkan bakgrunn og lífsreynslu. Pétur Geir líkti fjölbreytileikanum við þekkingarflóru – safn fjölbreyttrar þekkingar og reynslu sem verður til þegar nemendur kynnast hvort öðru.
