Eðli2BY05

• Áfanginn er grunnáfangi í eðlisfræði, þar sem æfð er framsetning og lausn verkefna sem tengjast varmafræði, hringhreyfingu, kasthreyfingu og hreyfilýsingu almennt, þyngdarkrafti, sveiflum og bylgjufræði, sér í lagi í tengslum við skynjun, ljósfyrirbæri (linsur, ljósbrot, regnbogi) og hljóðfræði hljóðfæra.
• Kennslan fer aðallega fram með samblandi af fyrirlestrum og dæmareikningi, auk verkefnavinnu.
• Verklegar æfingar eru einnig hluti kennslunnar þar sem nemendur vinna saman í hópum.

Lokapróf, annarpróf, verklegar æfingar, heimadæmi, fyrirlestrar og hópverkefni.

STÆR3HR05 (STÆ 503) (eða samhliða).

Nemandi skal hafa öðlast þekkingu og skilning á:

• Fyrsta lögmáli varmafræðinnar, hamskiptum, þrenns konar gerðum varmaflutnings.

• Hreyfijöfnum í tveimur og þremur víddum.

• Miðsóknarhröðun og miðsóknarkrafti.

• Diffur- og heildunarsambandi milli hreyfistærða, hreyfingum með ójafnri hröðun.

• Þyngdarlögmáli Newtons og lögmáli Keplers.

• Stöðuorku í þyngdarsviði, lausnarhraða, svartholum.

• Algengum tegundum bylgjuhreyfinga.

• Samliðun bylgna, bæði í plani og í einvíðum kerfum.

• Staðbylgjum, hljóðum og hljóðfæri.

• Hljóð og heyrn, hljóð- og skynstyrk.

• Dopplerhrifum.

• Ljósbroti og lögmáli Snels.

• Ljósgeislafræði og einföldum (þunnum) linsum, samsettu linsukerfi með tveimur linsum.

• Sveifluhreyfingu sem eðlilegu afsprengi af lögmáli Hookes og 2. lögmáli Newtons.

• Stærðfræðilegri lýsingu sveifluhreyfingar.

• Hvernig orka sveifils leikur á milli fjaðurorku og hreyfiorku.

Nemandi skal hafa öðlast leikni í að:

• Leysa einföld varmaleiðniverkefni.

• Beita hreyfjöfnum í tvívídd til að leysa hefðbundin kasthreyfingardæmi án loftmótstöðu.

• Nota diffrun og heildun til að tengja saman staðsetningu, hraða og hröðun almennt og einföldum tilvikum.

• Leysa einföld verkefni um hringhreyfingu hnatta í þyngdarsviði.

• Beita lögmálum Keplers til að vinna með sporbrautir (ellipsubrautir) almennt.

• Nota almenna framsetningu á stöðuorku í þyngdarsviði fyrir hluti á sporbraut og finna lausnarhraða hnatta.

• Setja upp og reikna einföld tilvik í bylgjufræði úr daglegu lífi.

Nemandi skal geta hagnýtt þá almennu þekkingu og leikni sem hann hefur aflað sér til að:

• Lýsa eðlisfræðilegum grundvelli algengra fyrirbæra daglega lífsins, og túlka með tilvísun í einföld lögmál eðlisfræðinnar.

• Útskýra muninn á miðsóknarkrafti og „miðflóttakrafti“.

• Meta fullyrðingar í fjölmiðlum og daglegri umræðu út frá forsendum vísinda og skynsemi.

• Líta á Jörðina og reikistjörnur sólkerfisins sem hluta af hinum víðari efnisheimi sem stjórnast af þyngdarkraftinum, en jafnframt að þekkja takmarkanir á þyngdarlögmáli Newtons og frekari útfærslu þess í almennu afstæðiskenningunni.

• Tengja skynjun okkar á umhverfinu með sjón og heyrn við þá eðlisfræði sem liggur þar til grundvallar.

• Útskýra styrkjandi og eyðandi samliðun í tveimur raufum og ljósgreiðu.

• Framkvæma, skilja og vinna úr verklegum æfingum sem tengjast námsefninu, og setja niðurstöður mælinga í samhengi við fræði.

• Gera sér grein fyrir sinni eigin stöðu í eðlisfræðinámi.

• Vera ábyrgur í að vinna sjálfur í að afla sér þekkingar.