Nordplus verkefni í Verzló: Nám, vinátta og skemmtilegir viðburðir

Þetta er lokaviðburður í þessari lotu verkefnisins, en áður hefur hópurinn hist í Færeyjum og Danmörku. Þetta er því í þriðja sinn sem hópurinn kemur saman og hefur hann myndað sterk tengsl sem sýnir hversu vel heppnað verkefnið er.

Fjölbreytt og skapandi dagskrá

Vikan hefur einkennst af fjölbreyttum verkefnum. Nemendur heimsóttu nýja handritasafnið í Eddu og fengu innsýn í heim tungumála í Veröld – húsi Vigdísar. Hópurinn kynntu sér einnig mikilvægt starf björgunarsveita, sem er skýrt dæmi um félagslega sjálfbærni í íslensku samfélagi og heimsóttu Perluna.

Félagslegi þátturinn skipaði einnig stóran sess. Hápunkturinn var þegar hópurinn gisti saman í skíðaskála í Bláfjöllum, þar sem góður andi og samheldni einkenndu samveruna. Að auki mun hópurinn heimsækja Alþingi og fara í ferð um Gullna hringinn, þar sem nemendur í NGK-bekknum munu slást í för og gera ferðina enn skemmtilegri.

Framhald verkefnisins

Þrátt fyrir að þetta sé lokaviðburður í þessari umferð verkefnisins, er það langt frá því að vera búið. Í vor mun nýr hópur nemenda frá þessum skólum hittast í Færeyjum og áætlað er að ferð til Danmerkur fari fram næsta haust. Fyrsta árs nemendur í Verzló geta enn sótt um þátttöku, en umsóknareyðublöð hafa þegar verið send til þeirra.

Kennarar og skipuleggjendur

Kennarar í verkefninu eru Katrín Jónsdóttir, dönsku- og lífsleiknikennari, Björn Jón Bragason, lögfræðikennari, og Hulda Hvönn Kristinsdóttir, stærðfræðikennari. Í næstu umferð mun Rasmus Steenberg Christiansen, dönskukennari, taka við af Huldu. Ármann Halldórsson, verkefnastjóri alþjóðaverkefna, hefur yfirumsjón með verkefninu og er öllum velkomið að senda fyrirspurnir á netfangið hans: armann@verslo.is

Þetta spennandi og metnaðarfulla Nordplus-verkefni er frábær leið fyrir nemendur til að kynnast nýjum menningarheimum, vinna saman að mikilvægum málefnum og mynda vinatengsl .