Nýsköpunar- og listabraut er bóknámsbraut þar sem lögð er áhersla á kjarnagreinar og sérgreinar brautarinnar sem eru listgreinar, hönnun og nýsköpun ásamt greinum tengdum viðskiptum. Nemendur fá verslunarpróf á 2. þrepi að loknum 112 einingum og lýkur brautinni með stúdentsprófi á 3. hæfniþrepi. Nemendur sem velja Nýsköpunar- og listabraut fá breiða almenna menntun og góðan undirbúning undir frekara nám á háskólastigi, sér í lagi innan hugvísinda og lista. Sérstök áhersla er lögð á að efla skapandi hugsun, frumkvæði og lausnarhæfni nemenda.

Inntökuskilyrði á Nýsköpunar- og listabraut er grunnskólapróf og hæfnieinkunn B í íslensku, ensku og stærðfræði. Ef fleiri umsóknir berast en skólinn getur tekið við verður tilgreint á heimasíðu hans hvernig inntöku nemenda er háttað.

Nám á brautinni er þrjú ár með 205 einingum til stúdentsprófs. Námið skiptist annars vegar í 95 eininga skólakjarna, sem er sameiginlegur á öllum brautum skólans, og hins vegar í 90 eininga brautarkjarna sem samanstendur af fögum sem einkenna brautina. Áfangarnir eru innan lista, hönnunar og nýsköpunar og fleiri tengdra greina. Að auki velja nemendur 20 einingar í frjálsu vali. Nemandi sem hefur stundað viðurkennt nám á tónlistar- eða hreyfisviði hefur möguleika á að fá tvo áfanga metna innan valgreinapakkans. Námið er bæði bóklegt og verklegt og fer fram í skólanum.

Lögð er áhersla á fjölbreytilegt námsmat. Lokaeinkunn hvers áfanga samanstendur ýmist af lokaprófi og símati eða eingöngu símati. Dæmi um símat er leiðsagnarmat, jafningjamat, munnleg og skrifleg verkefnaskil ásamt skilum á ferilmöppu. Í upphafi hverrar annar er nemendum kynnt námsáætlun, hæfniviðmið og tilhögun námsmats hvers áfanga. Til að standast áfanga skal nemandi fá að lágmarki einkunnina 5,0.

Einingafjöldi á brautinni er 205 einingar og er námstími til stúdentsprófs þrjú ár. Nemandi tekur því að meðaltali 68 einingar á ári. Í lok hverrar annar er ferill nemandans gerður upp og þarf hann að hafa náð að minnsta kosti 5,0 í öllum áföngum annarinnar áður en hann færist upp á næstu önn. Nánari skýringar á námsframvindu er að finna í skólareglum.

Að loknu námi skal nemandi hafa hæfni til að …

• geta nýtt sér nýjustu upplýsingatækni til að leysa fjölbreytt verkefni
• sýna frumkvæði, ábyrgð og umburðarlyndi og beita gagnrýnni hugsun
• miðla upplýsingum í ræðu og riti jafnt á íslensku sem og erlendum tungumálum
• meta og skilja menningarleg verðmæti
• gæta jafnréttis á öllum sviðum og temja sér ríka siðferðisvitund
• meta upplýsingar um samfélagið, umhverfið og náttúruna
• taka þátt í umræðum og rökstyðja mál sitt á málefnalegan hátt
• virða skoðanir annarra og geta leyst verkefni í samvinnu við aðra
• takast á við frekara nám á fjölbreyttum sviðum, s.s. listum, félags- og hugvísindum
• takast á við fjölbreytt störf og verkefni, einkum á sviði skapandi greina
• tileinka sér fjölbreytta hugsun við lausn mála, fræðilega, listræna og viðskiptalega
• sýna skapandi nálgun í listgrein sinni og nota viðeigandi aðferðir við útfærslu
• nota ímyndunarafl, innsæi og tilfinningar við sköpun eða flutning verka sinna
• meta listrænan styrk sinn og koma auga á hagnýtingu menntunar sinnar